കാസാ പീലാസാ മൂടുന്ന കബിലാനകളുടെ നിറം സംബന്ധിച്ച് അറിവുള്ളവർ വിവരണം തരാമോ? ചുവപ്പു മാത്രമാണ് ഉപയോഗിക്കേണ്ടതെന്ന് പണ്ഡിതാഭിപ്രായം.

കബിലനകളുടെ നിറം സംബന്ധിച്ചുള്ള എന്റെ അറിവും റെഡ് കളർ എന്ന് തന്നെയാണ്. ചുവപ്പു നിറം ജീവന്റെ (രക്തം) പ്രതീകമാകയാൽ ജീവപ്രദമായ തിരുശരീര രക്തങ്ങളാണ് കാബിലനകളാൽ മൂടപ്പെട്ടിരിക്കുന്നതു എന്നത് സൂചിപ്പിക്കുവാനായിട്ടാണ് പൂർവ്വപിതാക്കന്മാർ ആ നിറം നൽകിയത് എന്നാണ് എനിക്കു കിട്ടിയ അറിവ്. ചിത്തോലകളുടെ നിറങ്ങളും ഇപ്പോൾ പലരും പലവിധത്തിലും ഉപയോഗിക്കുന്നുണ്ടെങ്കിലും അതും ശരിയല്ലെന്നാണ് എനിക്കു പറയാനുള്ളത്. ചുവപ്പു നിറമേ പാടുള്ളൂ എന്നും, അങ്ങനെ എവിടെയോ വായിച്ചതായും ഓർക്കുന്നു. ചുവപ്പല്ലാതെ മറ്റ് നിറങ്ങളും ഉപയോഗിക്കാമോ? പലരും കാപ്പായുടെ നിറമനുസരുച്ചും, കഷ്ടാനുഭവാഴ്ചയിൽ കറുപ്പ് കബിലാനാകളും ഉപയോഗിച്ച് കാണുന്നു.

പൊതുവെ വിശുദ്ധമായവ മൂടി വയ്ക്കാൻ ചുവപ്പു നിറമുള്ള തുണികളാണ് ഉപയോഗിച്ച് കാണുന്നത്. കാസാ പീലാസാകൾ മൂടിക്കെട്ടി വയ്ക്കുന്നത് ചുവപ്പ് തുണിയിലാണ്. തബ്ലൈത്താ പലക മൂടിക്കെട്ടുന്നത് ചുവപ്പ് തുണിയിലാണ്. വിശുദ്ധ ത്രോണോസിൽ (ബോർഡറിന് നിറ വ്യത്യാസം ഉണ്ടെങ്കിലും) ഇടുന്നുന്ന ചിത്തോലയും ചുവപ്പാണ്. വിശുദ്ധ ഏവൻഗേലിയോൻ (ഇന്ന് പലയിടത്തും കാണുന്നപോലെ തടിയിലെ കൊത്തുപണി പുറത്തു കാണുംവിധം നഗ്നമായി ഏവൻഗേലിയോൻ മേശ ഇടാൻ അനുവാദമില്ല) മേശയിലിടുന്നതും ചുവപ്പ് തുണിയാണ്. വിശുദ്ധ മദ്ബഹായെ മറയ്ക്കാനുപയോഗിക്കുന്ന മറയുടെ നിറവും ചുവപ്പാണ്. വിശുദ്ധ സ്ലീബാ പൊതിയുന്നതും, അതിൽ കെട്ടുന്ന ഊറാറയും, തിരുമേനിമാരുടെ കൈയിലെ സ്ലീബായിലും എല്ലാം ചുവന്ന തുണിയാണ് ഉപയോഗിച്ചിരിക്കുന്നത്. നമസ്കാര മേശയിലും മാമോദീസാ തൊട്ടിയുടെ മുകളിലും തിരുശേഷിപ്പ് പേടകത്തിന് മുകളിലും (ചിലയിടത്ത് ശോശപ്പാ ഇട്ടിരുക്കുന്നത് കാണാം) വിരിച്ചിരിക്കുന്നതും ചുവന്ന തുണിയാണ്. പ്രദക്ഷിണത്തിനുപയോഗിക്കുന്ന മേക്കട്ടിയും ചുവപ്പാണ്. അങ്ങനെ എടുത്തു പറയാവുന്ന ധാരാളം കാര്യങ്ങൾ ഇനിയുമുണ്ട്. ഒരുപക്ഷേ സാമ്പത്തിക ഞെരുക്കം കാരണം പണ്ടുകാലത്ത് ഇതിനൊന്നും ഏകീകരണമില്ലായിരിക്കാം. പക്ഷേ, ഇന്നത്തെ സ്ഥിതി അതല്ല. അറിവില്ലായ്മ ഒരലങ്കാരമായി കൊണ്ടു നടക്കുന്നവരോട് ഇതൊക്കെ പറഞ്ഞിട്ട് കാര്യമില്ല.

കബിലാനകളുടെ നിറം സംബന്ധിച്ച് ഏതാണ് ശരിയായ രീതി...? അവ രേഖപ്പെടുത്തിയിരിക്കുന്ന പുസ്തകങ്ങളുടെ പേരും ആരെങ്കിലും പറഞ്ഞാൽ നന്നായിരുന്നു. മല്പാന്മാരുടെയും പണ്ഡിതന്മാരുടെയും അഭിപ്രായം പ്രതീക്ഷിക്കുന്നു.

ഫാ.ഗീവർഗ്ഗീസ് കോശി പുത്തൻവീട്ടിൽ, പട്ടാഴി.