പുതിയ വർഷാരംഭമായി ജനുവരി ഒന്നിനെ നമ്മളെല്ലാവരും വളരെ ആഘോഷമായി കൊണ്ടാടുമ്പോൾ, പരിശുദ്ധ സഭാസംബന്ധമായി നാം മറന്ന് പോകുന്ന ഒന്ന് രണ്ട് കാര്യങ്ങളുണ്ട്.

1.⁠ ⁠കർത്താവിനോട് ബന്ധപ്പെട്ട സകല പെരുന്നാളുകളേയും മോറാനായ പെരുന്നാൾ എന്ന് വിളിക്കുന്നു. ജനുവരി ഒന്ന്. കർത്താവിന്റെ "ചേലാകർമ്മം" നടന്ന ദിവസമായ ഒരു മോറാനായ പെരുന്നാൾ "ചേലാകർമ്മ പെരുന്നാൾ" ആണ്... കർത്തൃ ദിവസമായ ഞായറാഴ്ച എങ്ങനെ നാം കണക്കാക്കുന്നുവോ അത് പോലെ കണക്കിടേണ്ടതായ ദിവസം.

2.⁠ ⁠സ്ലീബാ നമസ്കാരത്തിലെ പ്രഭാത പ്രാർത്ഥനയിൽ 

"ശ്രേഷ്ഠന്മാർ ബസേലിയോസ് ഗ്രീഗോറിയോസ് ഇവർ സഹിതം

നിൻ സ്തുതി പാടാൻ കർത്താവേ! ഞങ്ങൾക്കർഹതയേകേണമേ..." എന്ന ഗീതത്തിൽ നാം ഓർക്കുന്ന പരിശുദ്ധരായ കപ്പദോക്യൻ പിതാക്കന്മാരായ മോർ ബസേലിയോസിന്റേയും, മോർ ഗ്രീഗോറിയോസിന്റേയും ഓർമ്മ ദിനമാണ് ജനുവരി ഒന്ന്.

3.⁠ ⁠നമ്മുടെ സകല പരിശുദ്ധരുടേയും, സകല മല്പാന്മാരുടേയും ഓർമ്മയും ഇതേ ദിവസം തന്നെ പരിശുദ്ധ സഭ കൊണ്ടാടുന്നു. ആയതിനാൽ സത്യ സുറിയാനി സഭയിലെ അംഗങ്ങളായ നമ്മൾ ഓരോരുത്തരും പുതിയവർഷാരംഭം ആഘോഷിക്കുന്നതൊടൊപ്പം പരിശുദ്ധ സഭാ സംബന്ധമായി ജനുവരി ഒന്നിന്റെ പ്രധാന്യം മനസ്സിലാക്കുകയും, അതുപോലെത്തന്നെ മറ്റുളളവർക്ക് ഈ ദിവസത്തിന്റെ പ്രാധാന്യത്തെപ്പറ്റി മനസ്സിലാക്കി കൊടുക്കുവാനും എളിയവരായ നമ്മുക്കും ശ്രമിക്കാമല്ലോ. അല്ലേ.?

ഫാ.ഗീവർഗ്ഗീസ് കോശി പുത്തൻവീട്ടിൽ, പട്ടാഴി.