ഏതെല്ലാം കാര്യങ്ങളിൽ?

ഉടമ്പടിയുടെ കാര്യത്തിൽ നാം ദൈവത്തെ തോല്പിക്കുന്നവരല്ലേ? യാക്കോബ് പിതാവിനെ വിട്ടു ഓടിപോകുമ്പോൾ ബേഥേൽ ദേശത്തുവച്ചു ദൈവവുമായി ഉടമ്പടി ചെയ്തു അഞ്ചു കാര്യങ്ങൾ സാധിപ്പിച്ചുകൊടുത്താൽ രണ്ടു കാര്യങ്ങൾ താൻ പാലിക്കാം. ദൈവം യാക്കോബിന്റെ ആഗ്രഹങ്ങൾ സാധിപ്പിച്ചുവെങ്കിലും യാക്കാബ് ചെയ്ത ഉടമ്പടിയിൽ നിന്നും പിന്മാറി ദൈവത്തെ തോല്പിച്ചു.

നാം എത്ര തവണ ദൈവസന്നിധിയിൽ വാക്കു പറഞ്ഞു. രോഗം, ബാദ്ധ്യത, പ്രതികൂലങ്ങൾ ഇവയുടെ നടുവിൽ വാക്കു പറഞ്ഞിട്ടു പാലിക്കാതെ ദൈവത്തെ തോല്പിച്ചിട്ടില്ലേ?

യിപ്താവു രാജാവു ദൈവസന്നിധിയിൽ പറഞ്ഞ വാക്കു പാലിച്ചു. അദ്ദേഹം പറഞ്ഞു. "യഹോവയോടു ഞാൻ പറഞ്ഞുപോയി. എനിക്കു പിൻമാറികൂടാ". ന്യായാ 11:35.

ദൈവത്തോടു നീ വാക്കു പറഞ്ഞിട്ടുണ്ടോ?
ഉടമ്പടി ചെയ്തീട്ടുണ്ടോ അനുഗ്രഹങ്ങൾ വാരികോരിതന്നപ്പോൾ വാക്കു പറഞ്ഞില്ലേ? രോഗം മാറ്റി തന്നപ്പോൾ ദൈവവുമായി ഉടമ്പടി ചെയ്തില്ലേ? തക്കസമയത്തു തക്കതായി പ്രവർത്തിച്ചപ്പോൾ നന്ദിസൂചകമായി ദൈവത്തോടു പറഞ്ഞതും എടുത്തതുമായ തീരുമാനങ്ങളിൽ ദൈവത്തെ തോല്പിച്ചിട്ടുണ്ടോ?

എന്നും വേദപുസ്തകം വായിക്കും, എന്നും പ്രാത്ഥിക്കും, ദൈവത്തിനായി സമയം നീക്കിവക്കുമെന്നും ദശാംശം കൊടുക്കുമെന്നും ദൈവസന്നിധിയിൽ ഉടമ്പടി ചെയ്തിട്ടു ആ ഉടമ്പടിയിൽ നിന്നും പിന്മാറിയാൽ നാം വാക്കിലും പ്രാർത്ഥനയിലും സമയത്തിലും പ്രവർത്തിയിലും ദശാംശത്തിലും ദൈവത്തെ തോല്പിക്കുന്നു.

നാം ദൈവസന്നിധിയിൽ ബോധിപ്പിച്ച വാക്കുകളെ ഉടമ്പടികളെ വീണ്ടും പരിശോധിക്കാം. പുതിയ തീരുമാനങ്ങളെടുക്കാം. അതു പ്രാവർത്തികമാക്കി ദൈവത്തെ തോല്പിക്കാതെ ജീവിതം വിജയപ്രദമാക്കാം.

ഫാ.ഗീവർഗ്ഗീസ് കോശി പുത്തൻവീട്ടിൽ, പട്ടാഴി.